“Глоб Интернэшнл” төрийн бус байгууллага 2010 оны 9-р сарын 20-ны өдрөөс эхлэн АНУ-ын Азийн сангийн дэмжлэгтэйгээр “Шударга ёсны од” төсөл хэрэгжүүлж эхэллээ. Хоёр сарын хугацаатай  энэ төсөл нь  УИХ-аар хууль хэлэлцэх явцад авлигатай тэмцэх, шударга ёсыг бэхжүүлэх, хариуцлагын тогтолцоо бий болгох, мэдээлэл нээлттэй, ил тод байх зарчмыг тусгах, ашиг сонирхлын зөрчлийг хориглох зэрэг асуудалд УИХ-ын гишүүдийн улс төрийн хүсэл, эрмэлзэл  ямар буйг олон нийтэд таниулах зорилготой.

Төслийн зорилт нь:
            • Авлигагүй орчин бүрдүүлэхэд хувь нэмрээ оруулахуйц хууль болон бусад эрх зүйн баримт бичгийг судлах
            • Хууль тогтоомж батлахад УИХ-ын гишүүдийн  авлигын эсрэг өгсөн саналд мониторинг хийж, хүсэл эрмэлзэл бүхий гишүүдийг тодорхойлох
            • Сонгосон төлөөлөгч нь авлигагүй орчин бий болгох, сонгогчдынхоо ахуй амьдралыг дээшлүүлэх талаарх хүсэл эрмэлзэл, үйл ажиллагааны  талаар иргэдэд мэдээлэх

Төслийн үр дүн:
           • УИХ-аар баталсан Авлигын эсрэг хуулийн жагсаалт бэлэн болж, нийтэлнэ.
           • Авлигын эсрэг хууль тогтоомжийн үнэлгээний картыг үндэслэн УИХ-ын гишүүдийн улс төрийн хүсэл зориг, санаачилгыг тогтоож, нийтэд мэдээлнэ.
           • УИХ-ын гишүүдийн амлалтыг тэдний үйл ажиллагаатай нь харьцуулан сонгогч иргэдэд нь мэдээлнэ.
           • Судалгааны тайланг хэвлэл мэдээлэл болон бусад мэдээллийн хэрэгслээр дамжуулан олон нийтэд хүргэнэ.